اطفالنا شياب

جميعنا لاحظ سوالف اطفال هاليومين بأنها اكبر من اعمارهم

وعدم وجود البراءه بهم ..اين اختفت الطفوله ؟

غريب عندما اذهب الى مكان عام واجد الاطفال اربعه او خمسه لا تتجاوز اعمارهم عن 11 عام بأيده زقاره وطاق العالم بالطوفه

وغريب ايضا ً عندما تتحدث انت وأحد افراد عائلتك بموضوع وتجد ان الطفل يناقشك ويبدي رأيه بالموضوع

انا صدمت بالحقيقه عندما اتاني ابن اخي عند استيقاضه من النوم ويقول لي عمي تصدق تحلمت اني متزوج وعندي بنت وبنتي اسمها نوف تلحقني بالصاله تقولي يبا عبود يبا عبود ودني الحديقه واهو لا يتجاوز عمره 10 اعوام ؟؟؟

فالحقيقه ألمني مشهد رأيته في احد القهاوي طفل عمره 14 سنه ماسك الشيشه وحاط ريل على ريل وجدامه قلاص جاي كبر راسه

وين راحت البراءه ؟؟؟

الحين الطفل عمره 12 سنه يسولف بالسياسه واخبار الانتخابات والفرعيات

انا صدمني ولد اخوي هالسكني الله يستر عليه اول ما استقالت الحكومه دخلت البيت جان يقولي عمي عمي دريت ؟؟؟ قلت لا مادريت شنو ؟ قال الحكوومه استقالت

قلتله شدراك ؟؟؟ قال مساع قالوا بالاخبار

يعني طفل لايتجاوز عمره 10 اعوام؟ يتابع الاخبار

وين البراءه؟؟؟

الحين الطفل يسولف بكل شي

الاخبار الاقتصاديه السهم الافلاني صعد والسهم الفلاني نزل

وعن ارتفاع الاسعار وعن العملات هذي صاعده وهذي نازله

وعن اسعار العقارات

وعن السياحه والسفر

عن كل شي كل شي

وين راحت الحركات الطفوليه واللعب ؟؟؟

ويييييييه يا ايامنا قبل الواحد فينا عمره 10 سنوات وياه محبالة طيور وحاط فيها غبّي وكله بالبراحه

وين ايام قبل اذا وصلت اعمارنا 13 سنه خلاص نسوي قعده بالبراحه ونشب نار وفالينها باربكيو بطاط

ههههههههههههههههههههههههههه

وين راحت حراسة باب الحاره ؟؟؟

ويييييه يا اياام زماان

نكون مجموعه وياويل اللي يدخل فريجنا واهو مو ساكن فيه

وين ايام الفلعات ؟

كله هواش فريجنا مع الفريج اللي يمنا واذا واحد فينا انفلع راح بيتهم يركض يمه لحقي راسي انبط تروح امه تحط على راسه حنّه يصير حصان

وين ايام الركض حفّاي ؟؟؟

قبل الواحد طبعا مايعرف يلعب كره بالاّبجين كله حافي واذا انشقت ريله يروح البيت يركض يمه ريلي انشقت تسدحه امه وواحد من اخوانه ويجوّون ريله

من باجر الولد شحليله مافيه شي

هذي الطفوله

هذي الحياه السعيده

الحين من يوصل عمره 9 سنوات قال يبا ابي تيلفون ياريت عاد لما يشتري التيلفون يطلع من البيت

انا ابي اسأل هل الاطفال اللي كل واحد ماسك تيلفونه وهياته بهالسوقه وطاق الثقل ورايح راد قبال المحلات النسائيه؟؟؟ اهمه يحسون بالمتعه مثل ماحسينا فيها يوم كنا بأعمارهم؟

والبنيات قبل شحليلهم قبل ماكو شعرها منفوووش ودراعتها قصيره وسناسينها طالعه واقفه عند باب بيتهم طبعا بتلعب ويانا يطردها واحد من اخوانها يعني خايف عليها واهو معصب دشي دااااااخل

اهي مابي مابي ابي اخوي الثاني ابي اخوي الثاني

ابي اخوي المقصد منها اني بلعب وياكم غصب

الحين عمرها 12 سنه والبشره ملعون سلسفيلها من المكياج

لاكن يا الله مو مشكله لكل زمن دوله ورجال

:p